नाशिक जिल्ह्यातील मालेगाव तालुक्यातील डोंगराळे येथील चिमुकलीवरील अत्याचार आणि हत्या प्रकरणात आज न्यायालयाने महत्त्वाचा निकाल दिला आहे.
सुमारे दहा महिन्यांपूर्वी घडलेल्या या प्रकरणात आरोपी विजय खैरनार याला न्यायालयाने दोषी ठरवले आहे. मात्र शिक्षेचा अंतिम निर्णय आज देण्यात आलेला नाही. आरोपीला आपले म्हणणे मांडण्यासाठी वेळ देण्यात आला असून, शिक्षेबाबत पुढील सुनावणी आता ७ ऑक्टोबर रोजी होणार आहे.
या संपूर्ण प्रकरणाचा न्यायालयीन प्रवास नेमका कसा झाला, पाहूया...
१६ नोव्हेंबर २०२५...
मालेगाव तालुक्यातील डोंगराळे गावात साडेतीन ते चार वर्षांची चिमुकली घराबाहेर खेळत असताना बेपत्ता झाली. कुटुंबीय आणि ग्रामस्थांनी तिचा शोध सुरू केला. काही वेळाने गावालगतच्या परिसरात तिचा मृतदेह आढळून आला.
वैद्यकीय तपासणीत बालिकेवर लैंगिक अत्याचार झाल्याचे आणि त्यानंतर तिची हत्या करण्यात आल्याचे समोर आले. या घटनेने डोंगराळेसह मालेगाव तालुका आणि संपूर्ण नाशिक जिल्ह्यात संतापाची लाट उसळली.
पोलिसांनी तपासाची चक्रे वेगाने फिरवत विजय संजय खैरनार याला अटक केली. त्याच्याविरुद्ध गुन्हा दाखल करून तपास सुरू करण्यात आला. घटनेच्या गांभीर्यामुळे जलदगतीने तपास पूर्ण करून सुमारे तीन आठवड्यांत आरोपपत्र दाखल करण्यात आल्याची माहिती समोर आली आहे.
दरम्यान, आरोपीला कठोरात कठोर शिक्षा व्हावी आणि खटला जलदगती न्यायालयात चालवावा, या मागणीसाठी डोंगराळे तसेच मालेगावमध्ये आंदोलने, मोर्चे आणि बंदही पाळण्यात आला.
या जनआक्रोशाची दखल घेत राज्य शासनाने या प्रकरणात विशेष सरकारी वकील म्हणून ॲड. उज्ज्वल निकम यांची नियुक्ती केली.
जानेवारी २०२६मध्ये खटल्याच्या प्रत्यक्ष सुनावणीला सुरुवात झाली.
१९ जानेवारीपासून जलदगती न्यायालयात सुनावणी सुरू झाली. पहिल्या टप्प्यात साक्षीदारांची तपासणी आणि उलटतपासणी झाली.
२० जानेवारीच्या सुनावणीत आरोपीच्या वकिलांकडून काही इलेक्ट्रॉनिक पुरावे आणि क्लिप न्यायालयासमोर सादर करण्यात आल्या. त्या पुराव्यांवर युक्तिवाद करण्यासाठी सरकार पक्षाने वेळ मागितला आणि न्यायालयाने पुढील सुनावणीसाठी २७ जानेवारीची तारीख दिली.
यानंतर खटल्यात साक्षीदारांच्या साक्षी, आरोपी पक्षाची उलटतपासणी आणि विविध पुराव्यांची तपासणी अशी न्यायालयीन प्रक्रिया पुढे सुरू राहिली.
या खटल्यात सरकार पक्षाने एकूण २४ साक्षीदार तपासले. त्यांच्या साक्षी आणि उलटतपासणीची प्रक्रिया पूर्ण झाल्यानंतर प्रकरण अंतिम युक्तिवादाच्या टप्प्यात पोहोचले.
सप्टेंबरमध्ये अंतिम युक्तिवादाला सुरुवात झाली.
७ सप्टेंबर रोजी विशेष सरकारी वकील ॲड. उज्ज्वल निकम यांनी जवळपास तीन तास सरकार पक्षाचा अंतिम युक्तिवाद मांडला.
सरकार पक्षाने न्यायालयासमोर डीएनए अहवाल, वैद्यकीय आणि फॉरेन्सिक अहवाल तसेच परिस्थितीजन्य पुराव्यांचा आधार घेत आरोपीविरुद्धची बाजू मांडली.
सरकार पक्षाच्या म्हणण्यानुसार, बालिकेवर अत्याचार केल्यानंतर तिचा करगोट्याने गळा आवळून खून करण्यात आला. घटनास्थळाशी संबंधित पुरावे, आरोपीच्या कपड्यांवरील रक्ताचे डाग आणि डीएनए अहवाल यांचा दाखला अंतिम युक्तिवादात देण्यात आला.
यानंतर सरकार पक्षाचा तसेच आरोपीच्या वतीने करण्यात आलेला अंतिम युक्तिवाद पूर्ण झाला.
२१ सप्टेंबर रोजी दोन्ही बाजूंचे अंतिम युक्तिवाद पूर्ण झाल्यानंतर न्यायालयाने निकालासाठी ३० सप्टेंबर २०२६ ही तारीख निश्चित केली होती. ॲड. उज्ज्वल निकम यांनी तोंडी युक्तिवादासोबत लेखी युक्तिवादही न्यायालयात सादर केला होता.
आणि आज... ३० सप्टेंबर २०२६.
मालेगावच्या न्यायालयात या बहुचर्चित प्रकरणाचा निकाल जाहीर झाला.
न्यायालयाने आरोपी विजय खैरनार याला त्याच्यावरील गुन्ह्यांमध्ये दोषी ठरवले आहे.
मात्र आजच शिक्षा सुनावण्यात आलेली नाही.
शिक्षा ठरवण्यापूर्वी आरोपीला आणि त्याच्या वकिलाला आपले म्हणणे मांडण्याची संधी देण्यात आली आहे. उपलब्ध माहितीनुसार, आरोपीच्या जेलमधील मागील वर्तनासह संबंधित अहवाल सादर करण्याचे निर्देशही देण्यात आले आहेत.
आता आरोपीला जन्मठेप किंवा मृत्युदंड यापैकी कोणती शिक्षा द्यायची, याबाबत पुढील कार्यवाही ७ ऑक्टोबर २०२६ रोजी होणार आहे.
म्हणजेच...
आज दोषसिद्धी झाली आहे; मात्र शिक्षेचा अंतिम निर्णय ७ ऑक्टोबरला होणार आहे.
डोंगराळे प्रकरणातील पुढील आणि अत्यंत महत्त्वाचा टप्पा आता ७ ऑक्टोबरच्या सुनावणीकडे लागला आहे.