शेतकरी योजनांच्या लाभासाठी महाडीबीटी पोर्टलवर नोंदणीकरिता मुदतवाढ; उप विभागीय कृषी अधिकारी देवरे
शेतकरी योजनांच्या लाभासाठी नोंदणी करण्याचे आवाहन
मालेगाव, दि. 1 (मालेगाव लाइव वृत्तसेवा): कृषी विभागाने महा-डीबीटी पोर्टलवर "शेतकरी योजना" या सदराखाली शेतकऱ्यांना सर्व योजनांचा लाभ एकाच अर्जाद्वारे देण्याच्या दृष्टीने अर्ज करण्यापासून ते प्रत्यक्ष लाभ मिळेपर्यंत एकात्मीक संगणकीय प्रणाली विकसित केलेली आहे. या प्रणालीव्दारे महाडीबीटी पोर्टलवर नोंदणी करण्यासाठी 11 जानेवारी 2020 पर्यंत मुदतवाढ देण्यात आली असून शेतकरी योजनांच्या लाभासाठी शेतकऱ्यांनी नोंदणी करण्याचे आवाहन उपविभागीय कृषी अधिकारी दिलीप देवरे यांनी शासकीय प्रसिध्दी पत्रकान्वये कळविले आहे.
महा-डीबीटी पोर्टलचे https://mahadoimahat.gov.in हे संकेतस्थळ असून या संकेतस्थळावर नोंदणी करण्यासाठी ‘‘शेतकरी योजना’’ हा पर्याय निवडावा. शेतकरी स्वत:च्या मोबाईल, संगणक/ लॅपटॉप/ टॅबलेट, सामुदायिक सेवा केंद्र (CSC), ग्रामपंचायतीतील संग्राम केंद्र आदी माध्यमातून वरील संकेतस्थळावर जाऊन अर्ज करू शकतील. वैयक्तिक लाभार्थी म्हणून नोंदणी करणाऱ्या सर्व शेतकऱ्यांना त्यांचा आधार क्रमांक संकेतस्थळावर प्रमाणित करून घ्यावा लागेल. ज्या वापरकर्त्याकडे आधार क्रमांक नसेल त्यांनी प्रथम आधार नोंदणी केंद्राकडे जाऊन त्यांची नोंदणी करावी व नोंदणी क्रमांक महा-डीबीटी पोर्टलमध्ये नमूद करून त्यांना योजनांसाठी अर्ज करता येईल. अशा अर्जदारांना अनुदान वितरीत करण्यापूर्वी महा-डीबीटी पोर्टलमध्ये त्यांना देण्यात येणारा आधार क्रमांक नोंदणीकृत करून प्रमाणित करून घ्यावा लागेल. त्याशिवाय अनुदानाचे वितरण करण्यात येणार नाही. पोर्टलवरील प्राप्त अर्जाची ऑनलाईन लॉटरी, पुर्व संमती देणे, मोका तपासणी तसेच निवड झालेल्या लाभाधारकांच्या खात्यावर थेट अनुदान वितरण करण्याची सर्व प्रक्रिया ऑनलाईन होणार आहे.
महा-डीबीटी पोर्टलवर माहिती भरण्याची कार्यवाही सुरु झाली असून यासाठी देण्यात आलेली अंतिम मुदतीस मुदतवाढ देण्यात आली असून 11 जानेवारी 2021 पर्यंत वाढविण्यात येत आहे. ज्या अर्जदारांनी यापूर्वी माहिती भरली असल्यास त्यांनी पुन्हा माहिती भरण्याची आवश्यकता नाही. मात्र लाभाच्या घटकांमध्ये शेतकरी बदल करू शकतात. ज्या शेतकरी बांधवांनी महा-डीबीटी पोर्टलवर कृषी विषयक योजनाचा लाभ मिळवण्यासाठी अद्याप अर्ज केला नसेल, त्यांनी 11 जानेवारी, 2021 पर्यंत आपले अर्ज पोर्टलवर भरावेत. या तारखेपर्यंत प्राप्त सर्व अर्ज लॉटरीसाठी ग्राह्य धरले जातील असेही प्रसिध्दी पत्रकान्वये कळविले आहे.
इच्छुक शेतक-यांनी नोंदणीसाठी देण्यात आलेल्या मुदतीवाढीच्या अनुषंगाने महा-डीबीटी पोर्टलवर नाव नोंदणी करण्याचे आवाहन तंत्र अधिकारी गोकुळ अहिरे व उपविभागीय कृषी अधिकारी दिलीप देवरे यांनी प्रसिध्दी पत्रकान्वये केले आहे.