एका तरुणीने ब्रेक ऐवजी चुकून एक्सलेटर वाढवला आणि ती स्कूटीसह थेट समोरील एटीएममध्येच शिरली. हि संपूर्ण घटना एटीएमच्या बाहेर असणाऱ्या सीसीटीव्ही कॅमेऱ्यात कैद झाली आहे.
नाशिकमधील सावता नगर परिसरात ही घटना घडली आहे. एका एटीएम सेंटरसमोर एक तरुणी स्कूटीवर बसली होती. त्याच दरम्यान चुकून तरुणीकडून गाडीचा एक्सलेटर वाढला. एक्सलेटर जोरात दिल्याने गाडीने लगेचच वेग पकडला. यानंतर तिला गाडी कंट्रोल नाही झाली. स्कूटी इतकी जोरात होती की, समोर असलेल्या एटीएमची काच फोडून तरुणी स्कूटीसह एटीएमच्या आत शिरली.
सुदैवाने या अपघातात कोणतीही जीवितहानी झालेली नाही. मात्र, एटीएम आणि गाडीचे मोठ्या प्रमाणात नुकसान झाले आहे. अचानक घडलेल्या या घटनेमुळे परिसरात एकच गोंधळ उडाला. या अपघाताची माहिती मिळताच पोलीस घटनास्थळी दाखल झाले.
