मुंबई : भोसरी एमआयडीसी जमीन कथित गैरव्यवहार प्रकरणात माजी महसूलमंत्री राष्ट्रवादी काँग्रेस पक्षाचे नेते एकनाथ खडसे यांची ५ कोटी ७३ लाख रुपयांची मालमत्ता सक्त वसुली संचालनालय ED ने जप्त केली आहे. लोणावळा आणि जळगाव इथल्या खडसेंच्या मालमत्तांवर ईडीनं केलेली कारवाई खडसेंसाठी मोठा धक्का मानला जात आहे. खडसेंनी अद्याप यावर कोणतीही प्रतिक्रिया दिलेली नाही.
( ED siezed property of ncp leader eknath khadse worth 5.73Cr )
भोसरी एमआयडीसी जमीन कथित गैरव्यवहार प्रकरणात गेल्या महिन्यात खडसेंची ९ तास चौकशी करण्यात आली होती. पुण्यातील भोसरी एमआयडीसी भूखंड व्यवहार प्रकरणात खडसेंचे जावई गिरीश चौधरी यांना अटक झाल्यानंतर खडसेंची चौकशी करण्यात आली होती. खडसेंच्या पत्नी मंदाकिनी खडसे यांनाही ईडीनं समन्स बजावलं होतं. मंदाकिनी खडसे यांना चौकशीसाठी हजर राहण्याचे आदेश देण्यात आले होते. मात्र, त्यांनी एका निवेदनाच्या माध्यमातून १४ दिवसांची मुदत मागितली होती.
भोसरी जमीन घोटाळा नेमका आहे तरी काय?
फडणवीस सरकारमध्ये एकनाथ खडसे महसूल मंत्री होते. त्यावेळी त्यांनी पुण्यातील भोसरी येथे ३.१ एकर एमआयडीसी प्लॉट खरेदी करण्यासाठी आपल्या पदाचा गैरवापर केल्याचा आरोप २०१६ मध्ये झाला होता. ३१ कोटी रुपयांची किंमत असलेल्या या भूखंडाची केवळ ३.७ कोटी रुपयांना विक्री झाल्याचा दावा केला गेला होता. रेडी रेकनर दरापेक्षा खूपच कमी बाजारमूल्य दाखवून जमिनीची खरेदी झाल्याचा आरोप आहे.
हा भूखंड अब्बास उकानी यांच्या मालकीचा होता. त्यांच्याकडून एमआयडीसीने 1971 मध्ये तो अधिग्रहण केला होता, परंतु उकानी यांना नुकसान भरपाई देण्याचा मुद्दा न्यायालयात प्रलंबित आहे. खडसे यांनी 12 एप्रिल, 2016 रोजी बैठक बोलावली आणि अधिकाऱ्यांना जमीन उकानींना परत द्यावी की त्यांना जास्त नुकसानभरपाई द्यावी याविषयी त्वरित निर्णय घेण्याचे निर्देश दिल्याचा दावा केला जातो. पंधरवड्यातच उकानी यांनी खडसे यांच्या नातलगांना (पत्नी मंदाकिनी खडसे आणि जावई गिरीश चौधरी) भूखंड विक्री केल्याचं समोर आलं होतं.
खडसेंची 9 तास ईडी चौकशी
दरम्यान, एकनाथ खडसे 8 जुलै रोजी सकाळी 11 वाजताच्या सुमारास ईडी कार्यालयात चौकशीसाठी हजर झाले होते. 9 तासांच्या चौकशीनंतर रात्री आठच्या सुमारास ते कार्यालयाबाहेर पडले. यावेळी एकनाथ खडसे यांनी स्वतः माध्यमांशी बोलणं टाळलं. चौकशी झाल्यावर ईडी कार्यालयातून बाहेर पडल्यानंतर ते थेट आपल्या गाडीत बसून रवाना झाले. त्यांच्या वकिलांनी माध्यमांना या चौकशीची माहिती दिली. यावेळी वकिलांनी ईडी चौकशीसाठी जितक्या वेळा बोलावेल तितक्या वेळा हजर राहण्याचं खडसेंनी आश्वासन दिल्याचं सांगितलं.
साभार : लोकमत, TV9