येथील करन्सी नोट प्रेस मधून ५०० रुपयांच्या १०० नोटांचे १० बंडल कोऱ्या करकरीत नोटा म्हणजेच ५ लाख रुपये असलेले एक पाकिट गायब झाल्याचा धक्कादायक प्रकार उघडकीस आला आहे. या घटनेने मोठी खळबळ माजली आहे. लॉक डाऊन मुळे प्रेसचे काम सुमारे २ महिने बंद होते. अखेर व्यवस्थापनाने उपनगर पोलीस स्टेशनला धाव घेतली आहे. सदर ठिकाणी अभेद्य सुरक्षा कवच असताना नोटा गायब झाल्याने आश्चर्य व्यक्त होत आहे. तेलगी घोटाळ्या नंतर पुन्हा एका घोटाळ्याची शक्यता वर्तवण्यात येत आहे.
या बाबत मिळालेली माहिती अशी कि, नाशिक येथील करन्सी नोट प्रेसमध्ये ५०० व २०० रुपयांच्या नोटा सह सर्व छोट्या नोटांची छपाई केली जाते. या प्रेस मधून ५०० व २०० रुपयाची छापलेल्या नोटाचे कागद गेल्या आठवड्यात गायब झाले होते. करन्सी नोट प्रेस मध्ये ज्या ठिकाणी छपाई होते त्या ठिकाणी सीसीटीव्ही कुठेच उपलब्ध नसल्यामुळे व्यवस्थापनाची कोंडी झाली आहे.
गेल्या आठवड्यापासून याबाबत गोपनीय चौकशी सुरु असून दोषी कोण ?, कोणी या नोटा गायब केल्या त्याचबरोबर कुठल्या युनिट मधून सफाई करताना हे पैसे गायब करण्यात आले. या बद्दलची माहिती अद्याप मिळू शकलेली नाही. एका युनिटमध्ये अडीचशे ते तीनशे कर्मचारी काम करत असल्यामुळे कोणत्या शिफ्ट मधून कोणत्या वेळेस हे पैसे गायब झाले याचा शोध आता पोलीस घेत आहेत
नोटा छापल्यानंतर बॉक्समध्ये पॅकिंग करून रिझर्व बँकेला ते पाठवण्यात येतात. त्यावेळी नोटा मोजणी करताना हा सर्व प्रकार उघडकीस आला. प्रथम दर्शनी ५ लाख रुपये गायब झाल्याचे समोर आले असून यामध्ये वाढ होण्याची शक्यता नाकारता येत नाही.
या सिक्युरिटी प्रेसला CISF म्हणजे सेंट्रल इंडस्ट्रियल सिक्यूरिटी फोर्सची सुरक्षा आहे, असे असताना इतकी मोठी रक्कम गायब झालिव्ह कशी असा प्रश्न उपस्थित होत आहे. हा प्रकार उघड झाल्यानंतर CISF सतर्क झाली आहे. पूर्वी कर्मचाऱ्यांची चेकिंग न करता येजा सुर असे किंवा काही विशिष्ट नेत्यांना पदाधिकाऱ्यांना या मधून पूर्णपणे सुट दिली जात असे. मात्र आता प्रत्येक कर्मचाऱ्याची कसोशीने तपासणी करण्यात येते. प्रत्येकाला आयकार्ड बंधनकारक करण्यात आले. तसेच त्यांच्याजवळ असलेल्या लॉकरमध्ये मोबाईल ठेवणे आणि वापराची सुविधा काढून घेण्यात आली आहे.
